Rreth Nesh
Historiku
Qyteti i Tiranës, deri në vitin 1939, furnizohej me ujë përmes puseve vetjake. Me ndërtimin e qendrës së Tiranës dhe përfundimin e objekteve kryesore si Ministritë dhe shëtitorja “Dëshmorët e Kombit”, u vu në funksion Impianti i Pastrimit të Ujit në Brar. Ky impiant furnizonte objektet e ndërtuara duke marrë ujë nga lumi i Tiranës pranë kataraktit me një prurje prej 40 l/sek.
Për administrimin e këtij impianti dhe rrjetit të shpërndarjes u krijua Shoqëria e Ujësjellësit Tiranë, nën varësinë e Ministrisë së Punëve Botore. Ky administrim vazhdoi edhe pas çlirimit të vendit, me lëshimin e lejëve për ndërtimin e çezmave publike në qytet.
Në vitin 1951, burimeve ekzistuese iu shtuan edhe burimet e Selitës, të cilat pas trajtimit në hidrocentralin Lana-Bregas shpërndaheshin në depot e qytetit. Me rritjen e numrit të konsumatorëve, kërkesat për ujë u shtuan, duke sjellë në vitin 1964 përfshirjen e burimeve të Bovillës me prurje 140-420 l/sek dhe burimeve të Shën Mërisë me prurje 600 l/sek.
Në vitin 1988, për të përballuar kërkesat në rritje, u shtuan burime të reja me ngritje mekanike si Bërxull dhe Pishinat. Po në këtë vit u krye studimi për ndërtimin e Digës së Bovillës me një kapacitet prej 80 milionë m³ ujë dhe aftësi përpunuese prej 40 milionë m³ ujë.
Diga e Bovillës përfundoi në vitin 1999 dhe në funksion të saj u ndërtua Impianti i Pastrimit të Ujit, me kapacitet përpunues prej 1800 l/sek. Ky impiant u vu në punë në vitin 2000. Në vitin 2003, Ndërmarrja Ujësjellës-Kanalizime Qytet, e cila varej nga Ministria e Ekonomisë, u bashkua me Ndërmarrjen e Ujësjellësit Fshat, që varej nga Qarku i Tiranës, duke krijuar një strukturë të unifikuar për menaxhimin e furnizimit me ujë dhe kanalizimeve në të gjithë zonën e Tiranës.
Në janar të vitit 2007, Shoqëria Strategjike Ujësjellës Kanalizime Tiranë u transferua në pronësi të njësive vendore të zonës së shërbimit, të përbëra nga 3 bashki dhe 16 komuna. Licenca e fundit e shoqërisë u rinovua nga Komisioni Kombëtar Rregullator i Ujit në mars të vitit 2010, pas një procesi të plotë monitorimi dhe vlerësimi nga Enti Rregullator i Ujit.
Ujësjellës Kanalizime Tiranë operon si një shoqëri aksionare me misionin kryesor sigurimin e furnizimit të qëndrueshëm me ujë për konsumatorët. Furnizimi me ujë në Tiranë realizohet përmes tre lloje burimesh: burime me vetë-rrjedhje (kryesisht malore), burime sipërfaqësore të akumuluara në rezervuarin e Bovillës dhe burime nëntokësore me ngritje mekanike.
Misioni ynë
· Furnizim i pandërprerë dhe cilësor – Ujë 24/7, për çdo familje dhe biznes në Tiranë.
· Mbrojtja e mjedisit – Trajtim dhe menaxhim efikas i ujërave të ndotura për një qytet të pastër.
· Investim në njerëz – Staf i kualifikuar, inovacion dhe teknologji për një shërbim modern.
· Përmirësim i vazhdueshëm – Zhvillim i qëndrueshëm për të garantuar furnizim afatgjatë dhe investime të reja.
Vizioni ynë
Të jemi lider në furnizimin me ujë të pijshëm dhe menaxhimin e ujërave të ndotura në Shqipëri, duke inovuar dhe investuar për një të ardhme më të mirë për komunitetin dhe mjedisin.
Vlerat tona
· Klienti në qendër – Shërbim i shpejtë, transparent dhe me cilësi të lartë.
· Besueshmëri dhe integritet – Komunikim i hapur dhe korrekt me komunitetin.
· Forca jonë janë njerëzit – Punonjës të motivuar dhe të trajnuar për sfidat e së ardhmes.